जुम्लामा यस वर्ष तिहारमा खेलिने देउसी–भैलो कार्यक्रमलाई प्रतिबन्ध गरिएको छ ।
जिल्ला प्रशासन कार्यालयले कोरोनाको महामारीलाई मध्यनजर गर्दै देउसी–भैलो खेल्न प्रतिबन्ध लगाएको हो ।
महामारीको अवस्थामा यस वर्ष जिल्लाका सबै स्थानीय तहहरूमा देउसी–भैलो खेल्न रोक लगाइएको जिल्ला प्रशासन कार्यालय जुम्लाले जनाएको छ ।
जिल्लाको एक नगरपालिका र सात गाउँपालिका गरी आठवटा स्थानीय तहमा देउसी–भैलो खेल्न रोक लगाइएको प्रमुख जिल्ला अधिकारी भूपेन्द्र थापाले बताए ।
उनले भने, ‘देउसी–भैलोको कार्यक्रम गर्दा धेरै जमघट हुने हुन्छ । यसकारणले कोरोना संक्रमणको झन जोखिम उच्च हुने सम्भावना हुन्छ । जसका लागि हामीले यस वर्ष जिल्लाभरि देउसी–भैलो खेल्न प्रतिबन्ध लागाउने निर्णय गरेका हौँ ।’
जिल्ला सुरक्षा समितिले मात्रै निगरानी गरेर हुँदैन, सबै स्थानीय तह जिम्मेवारी हुन आवश्यक छ । जिल्ला सुरक्षा समितिले तिहारमा देउसी–भैलो खेल्न नदिन जुम्लाका सबै स्थानीय तहलाई पत्राचारसमेत गरिएको उनले बताए ।
कुनै पनि ठाउँमा यस्ता कार्य गरेको पाइएमा जोसुकैलाई संक्रामक रोग ऐन, २०२० र स्थानीय प्रशासन ऐन, २०२८ अनुसार कारबाही गरिनेछ ।
तिहारमा हुने आगलागीजस्ता गतिविधिलाई मध्यनजर गरी आतिसबाजी, पटकालगायतका ज्वलनशील प्रदार्थ प्रयोग गर्न र बिक्री–वितरणमा रोक लगाइएको जिल्ला प्रशासन जुम्लाले जनाएको छ ।
साथै अनावश्यक रूपमा सार्वजनिक रूपमा जमघाट, राजनीतिक भेला, सभा, सम्मेलनजस्ता कार्य गरी शन्तिसुरक्षामा, सुव्यस्थामा खलल पुऱ्याउने कुनै खालको गतिविधि गरेको खण्डमा कानुनी कारबाही गरिने प्रशासनले चेतावनीसमेत दिएको छ ।
तिहारको अवधिभर साँझ ७ बजेभन्दा पछि मदिरा बेचबिखन गर्न पाइनेछैन ।
तिहारको रमाइलो गर्ने बाहनामा होहल्ला गरी शान्तिसुरक्षा भंग गर्ने, जुवाताज खेल्ने खेलाउने कार्य गरेको खण्डमा प्रशासनले प्रचलित कानुनबमोजिम कारबाही गर्नेछ ।
तिहारलाई लक्षित गरी घट्ने घटनालाई मध्यनजर गरी सुरक्षाकर्मी थप परिचालन गरिने प्रहरी नायव उपरीक्षक माधव काफ्लेले बताए । उनले भने, ‘सबैभन्दा बढी जमघाट हुने स्थानमा सुरक्षा व्यवस्था कडा पारिनेछ ।’
प्रहरी प्रशासनले मात्रै कडा गरेर हुँदैन, महामारीबाट बच्नका निम्ति आमनागरिकले आफ्नो कर्तव्य निर्वाह गर्न जरुरी छ ।
जिल्लामा कुल संक्रमितको संख्या तीन सय ६९ पुगेको जिल्ला प्रशासन कार्यालय जुम्लाको तथ्यांकमा उल्लेख छ ।
त्यस्तै, तीन सय ३२ जना भएका छन् भने सक्रिय संक्रमित ३७ जना रहेका छन् ।
